Áform um frumvarp til laga um breytingu á lögum um fjárhagslegar viðmiðanir

Með lögum um fjárhagslegar viðmiðanir, nr. 7/2021, var reglugerð Evrópusambandsins um fjárhagslegar viðmiðanir veitt lagagildi hér á landi. Reglugerðin hefur að geyma reglur um gerð og notkun viðmiðunarvísitalna á borð við Libor-vexti sem liggja til grundvallar ýmsum samningum á sviði fjármálamarkaðar. Meðal annars er mælt fyrir um starfshætti aðila sem taka saman viðmiðanir, starfsleyfi, aðferðafræði við vinnslu viðmiðana og eftirlit. Evrópusambandið samþykkti í febrúar 2021 breytingar á reglugerðinni. Helstu breytingar eru annars vegar að undanþiggja viðmiðanir fyrir stundargengi gjaldmiðla sem framkvæmdastjórn Evrópusambandsins tilgreinir gildissviði reglugerðarinnar og hins vegar að heimila framkvæmdastjórninni eða lögbærum yfirvöldum í aðildarríkjum að ákvarða viðmiðanir sem skuli notast við ef hætt er að gera viðmiðanir sem samningar eða aðrir fjárhagslegir gerningar vísa í eða þær verða ónothæfar og aðilar að gerningunum hafa ekki komið sér saman um aðrar viðmiðanir til að styðjast við. Unnið er að upptöku breytinganna í EES-samninginn. Íslandi ber þjóðréttarleg skylda til að innleiða þær í landsrétt þegar þær verða teknar upp í samninginn. Ráðherra áformar að leggja fram frumvarp um breytingu á lögum um fjárhagslegar viðmiðanir til að veita breytingunum lagagildi hér á landi.

Samráðsgátt og Alþingi nota hvort sitt númerakerfi: S-númer í gáttinni er ekki málsnúmer á Alþingi. Alviti tengir samráðsmál við þingmál eftir ráðuneyti, tegund máls, tímasetningu og orðalagi.

Heimild: Samráðsgátt stjórnvalda · Skoða á althingi.is (opnast í nýjum flipa)